Ieu buku medal dimimitian ku “DIMINBAR”, diajar mikmin babarengan, dina hiji rohang grup WA, nu lolobana guru. Aya nu geus moyan, aya nu masih taram-taram, jeung aya nu kakara pisan diajarna. Sim kuring ukur ngaping sakumaha aturan lamun nyieun fiksi mini basa Sunda. Teu pisan-pisan ngaku pupuhu da akur jeung nu lian sarua diajar.

Dina prakna kuring ogé bari loba tatanya ka nu geus moyan palebah nyieun fikmin. Méré sababaraha conto, ti pangarang nu geus sohor keur nu dialajar. Sababaraha bulan, nu ngarapungkeun fikmin dibéré kamandang jeung dilelempeng éjahanana. Nya ku ningali sumangetna, alhamdulillah, aya reueus, geuning masih aya kénéh nu hayang ngamumulé basa Sunda.

Fiksi mini basa Sunda nyaéta carita pondok nakeranan nu ngan sababaraha paragrap tur diwatesanan 150 kecap. Eusi caritana dipeureut tur matak panasaran nu maca. Bisa mangrupa-rupa jejer nu ahéng. Kakuatan fikmin téh aya dina unsur carita jeung unsur séjénna. Pungkasanana anu matak hélok, bisa ku cara sina ngagentak, ngagilek, atawa lapat-lapat ngaweuhan. Kitu sakuduna mah. Tapi keun da ieu mah fiksi mini nu dialajar, da keur nu nulis mah ieu téh mangrupa kareueus bisa ngajanggélék jadi buku ogé hasil bajoang.